आक्षेपार्ह स्टेटस भोवले; मनोज जरांगे पाटील यांच्या अवमानाच्या आरोपाखाली तरुण ताब्यात..!

जामखेड (खर्डा) : मराठा समाजाच्या भावना दुखावतील, अशा आशयाचे स्टेटस सोशल मीडियावर ठेवल्याच्या आरोपावरून खर्डा पोलिसांनी एका तरुणाविरुद्ध गुन्हा दाखल करून त्याला ताब्यात घेतल्याची माहिती पोलिसांनी दिली आहे. पोलिसांकडून मिळालेल्या माहितीनुसार, दिनांक 11 सप्टेंबर 2026 रोजी विठ्ठल तोंडे, रा. सतेवाडी, पोस्ट नायगाव, ता. जामखेड यांनी आपल्या मोबाईलवरून कृत्रिम बुद्धिमत्ता (AI) तंत्रज्ञानाचा वापर करून मनोज जरांगे पाटील यांचा कथितरीत्या आक्षेपार्ह फोटो तयार करून तो सोशल मीडियावरील स्टेटसला ठेवल्याचा आरोप आहे. या स्टेटसमुळे मराठा समाजाच्या भावना दुखावल्याचा आरोपही करण्यात आला आहे. तसेच संबंधित स्टेटसनंतर एक संदेश प्रसारित करण्यात आल्याची माहिती असून, त्याबाबत नायगाव येथील काही नागरिकांनी संबंधित व्यक्तीला आक्षेप घेतल्याचे सांगितले. मात्र, संबंधित व्यक्तीने स्टेटस हटविले नसल्याचा आरोप करण्यात आला आहे. या संदर्भातील संभाषणाची ध्वनिमुद्रिका असल्याचीही माहिती देण्यात आली आहे. या प्रकरणी नायगाव येथील मराठा समाजातील सुमारे 40 ते 50 युवक व नागरिकांनी खर्डा पोलीस ठाण्यात येऊन संबंधित व्यक्तीवर कारवाई करून गुन्हा दाखल करण्याची मागणी केली होती. त्यानुसार संबंधित व्यक्तीविरुद्ध खर्डा पोलीस ठाणे गुन्हा रजिस्टर क्रमांक 159/2026 अन्वये भारतीय न्याय संहिता कलम 353(5) आणि 356 प्रमाणे गुन्हा दाखल करण्यात आल्याची माहिती पोलिसांनी दिली आहे. गुन्हा दाखल झाल्यानंतर खर्डा पोलीस ठाण्याचे प्रभारी अधिकारी तथा सहाय्यक पोलीस निरीक्षक उज्वलसिंह राजपूत यांनी पथक रवाना केले. पथकातील पोलीस हवालदार शेंडे व पोलीस कर्मचारी म्हस्के यांनी संबंधित आरोपीला जामखेड परिसरातून 24 तासांच्या आत ताब्यात घेतल्याची माहिती पोलिसांनी दिली आहे. या प्रकरणाचा पुढील तपास पोलीस हेड कॉन्स्टेबल शिरसागर करीत आहेत. ही कारवाई पोलीस अधीक्षक सुदर्शन मुमक्का, अपर पोलीस अधीक्षक वैभव कलुबर्गे आणि उपविभागीय पोलीस अधिकारी सुजितकुमार क्षीरसागर यांच्या मार्गदर्शनाखाली खर्डा पोलीस ठाण्याचे प्रभारी अधिकारी सहाय्यक पोलीस निरीक्षक उज्वलसिंह राजपूत, पोलीस उपनिरीक्षक अशोक खेडकर तसेच पोलीस कर्मचारी संभाजी शेंडे, संदीप धामने आणि शशी म्हस्के यांनी केली.