भाजप गोपीचंद पडळकरांचा उमेदवारी अर्ज वैध; सांगली जिल्हा बँकेच्या निवडणुकीचा मार्ग मोकळा!

सांगली | प्रतिनिधी : सांगली जिल्हा मध्यवर्ती सहकारी बँकेच्या निवडणुकीत महत्त्वाची घडामोड घडली आहे. जत विकास सोसायटी गटातून भाजपचे आमदार गोपीचंद पडळकर यांनी दाखल केलेला उमेदवारी अर्ज सर्वोच्च न्यायालयाने वैध ठरवला आहे. त्यामुळे अर्ज बाद झाल्यानंतर न्यायालयात धाव घेतलेल्या पडळकर यांना दिलासा मिळाला असून, जिल्हा बँकेच्या निवडणुकीतील त्यांचा सहभाग कायम राहण्याचा मार्ग मोकळा झाला आहे.

पडळकर यांनी जत विकास सोसायटी गटातून उमेदवारी अर्ज दाखल केला होता. मात्र, छाननीदरम्यान त्यांचा अर्ज बाद करण्यात आला. या निर्णयाविरोधात त्यांनी न्यायालयात दाद मागितली. मुंबई उच्च न्यायालयाच्या कोल्हापूर सर्किट बेंचनेही अर्ज बाद करण्याचा निर्णय कायम ठेवल्यानंतर पडळकर यांनी सर्वोच्च न्यायालयात याचिका दाखल केली होती.

या प्रकरणाची सुनावणी सरन्यायाधीश सूर्यकांत यांच्यासमोर झाली. पडळकर यांच्या बाजूने ज्येष्ठ विधिज्ञ अॅड. मुकुल रोहतगी आणि अॅड. आनंद लांडगे यांनी युक्तिवाद केला, तर त्यांचे प्रतिस्पर्धी विक्रमसिंह सावंत यांच्या बाजूने ज्येष्ठ वकील अॅड. अभिषेक मनू सिंघवी यांनी बाजू मांडली. दोन्ही बाजूंचे युक्तिवाद ऐकल्यानंतर सर्वोच्च न्यायालयाने पडळकर यांचा उमेदवारी अर्ज वैध ठरवला.

‘सत्याचा विजय, न्यायाचा विजय!’ पडळकरांची प्रतिक्रिया

सर्वोच्च न्यायालयाच्या निर्णयानंतर आमदार गोपीचंद पडळकर यांनी सोशल मीडियावर प्रतिक्रिया व्यक्त केली. ‘सत्याचा विजय, न्यायाचा विजय!’ असे म्हणत त्यांनी सर्वोच्च न्यायालयाचे आभार मानले.

आपल्या पोस्टमध्ये पडळकर यांनी विरोधकांवर टीका करत, आपल्याला निवडणुकीतून बाजूला करण्याचे प्रयत्न झाल्याचा आरोप केला. सहकार क्षेत्रात वर्षानुवर्षे चालत आलेली सत्तेची मक्तेदारी मोडून काढण्यासाठी ही लढाई असल्याचेही त्यांनी म्हटले. कायदेशीर लढाईत निकाल आपल्या बाजूने आला असून, आता सहकाराच्या मैदानात पूर्ण ताकदीने उतरणार असल्याचे त्यांनी स्पष्ट केले.

सांगलीच्या राजकीय वर्तुळाचे लक्ष निवडणुकीकडे

उमेदवारी अर्ज बाद झाल्यापासून सर्वोच्च न्यायालयाच्या निर्णयापर्यंत या प्रकरणाची सांगली जिल्ह्याच्या राजकीय वर्तुळात चर्चा सुरू होती. आता सर्वोच्च न्यायालयाच्या निर्णयामुळे जत विकास सोसायटी गटातील निवडणुकीचे चित्र बदलले असून, पुढील निवडणूक प्रक्रियेकडे सर्वांचे लक्ष लागले आहे.

सर्वोच्च न्यायालयाच्या निर्णयामुळे गोपीचंद पडळकर यांचा उमेदवारी अर्ज वैध ठरला आहे. आता सांगली जिल्हा मध्यवर्ती सहकारी बँकेच्या निवडणुकीत पुढे काय घडणार, याकडे राजकीय वर्तुळाचे लक्ष असेल.