गणपती वर्गणी न दिल्यामुळे तरुणाला मारहाण; मिरजगाव पोलीस ठाण्यात खंडणीचा गुन्हा दाखल!

कर्जत (मिरजगाव) : गणपतीच्या वर्गणीच्या पैशांवरून वाद झाल्यानंतर तरुणाला मारहाण केल्याची घटना कर्जत तालुक्यातील नागलवाडी येथे घडली. याप्रकरणी मिरजगाव पोलिसांनी दोन जणांविरुद्ध गुन्हा दाखल केला आहे. पोलिसांच्या नोंदीनुसार, महेश संजय गिरी (वय २४) हे सौर ऊर्जा प्रकल्प, नागलवाडी येथे हेल्पर म्हणून काम करतात. २४ सप्टेंबर रोजी सकाळी सुमारे ९ वाजता छत्रपती शिवाजी महाराज चौक, नागलवाडी येथे त्यांच्याकडे गणपतीच्या वर्गणीसाठी एक हजार रुपयांची मागणी करण्यात आली. वर्गणी देण्यास नकार दिल्यानंतर वाद झाला आणि त्यांना शिवीगाळ व दमदाटी करून मारहाण केल्याची तक्रार आहे.या प्रकरणी बाळू ऊर्फ बुपल धनंजय शेळके आणि तुषार धनंजय शेळके, दोघेही रा. नागलवाडी, ता. कर्जत, जि. अहिल्यानगर यांच्याविरुद्ध मिरजगाव पोलीस ठाण्यात गुन्हा दाखल करण्यात आला आहे.पोलिस नोंदीनुसार गुन्हा २४ सप्टेंबर २०२६ रोजी सायंकाळी ४.२६ वाजता दाखल झाला असून, प्रकरणाचा पुढील तपास पोलीस स.फौ. डी.एस.कासार करीत आहेत. उपलब्ध नोंदीनुसार आरोपींची अटक झालेली नाही.