निमगाव डाकू ग्रामपंचायतीतील अनियमिततेप्रकरणी कारवाईचे आदेश; जबाबदारांकडून रक्कम वसुलीचे निर्देश!

कर्जत : निमगाव डाकू ग्रामपंचायतीतील कथित अनियमितता व गैरप्रकारांबाबत प्राप्त तक्रारीची दखल घेत जिल्हा परिषद अहिल्यानगरच्या ग्रामपंचायत विभागाने कारवाईचे निर्देश दिले आहेत. या प्रकरणी तक्रारदार सागर मुरलीधर गिरे, मु.पो. निमगाव डाकू, ता. कर्जत यांनी कार्यालयाकडे तक्रार अर्ज सादर केला होता. या तक्रारीसंदर्भात विविध पत्रव्यवहार व कागदपत्रांची पाहणी करण्यात आल्यानंतर मुख्य कार्यकारी अधिकारी व उपमुख्य कार्यकारी अधिकारी, जिल्हा परिषद अहिल्यानगर यांच्याकडे प्रकरण सादर करण्यात आले. त्यानंतर पंचायत समिती कर्जत येथील संबंधित अधिकाऱ्यांना पुढील कारवाई करण्याचे निर्देश देण्यात आले आहेत. आदेशानुसार, सदर प्रकरणातील जबाबदार अधिकारी अथवा कर्मचारी यांच्याकडून रक्कम निश्चित करून त्यांच्या चालू महिन्याच्या पगारातून वसुलीची कारवाई तात्काळ करण्याचे निर्देश देण्यात आले आहेत. तसेच संबंधित जबाबदार अधिकारी किंवा कर्मचारी सेवानिवृत्त असल्यास त्यांच्या पेन्शनमधून वसुली करण्याची कार्यवाही करण्याचे सांगण्यात आले आहे. याशिवाय संबंधित प्रकरणातील जबाबदार पदाधिकाऱ्यांकडून नियमानुसार रक्कम वसूल करण्याची कारवाई करावी, असेही आदेशात नमूद आहे. विशेष म्हणजे, तक्रारदाराच्या तक्रारीतील आरोपांमध्ये पुढील चौकशी व कारवाई आवश्यक असल्यास त्याबाबतचा अहवाल सादर करून पुढील निर्णय घेण्यात यावा, असे निर्देश देण्यात आले आहेत. या आदेशामुळे निमगाव डाकू ग्रामपंचायतीतील संबंधित प्रकरणात प्रशासनाने गांभीर्याने दखल घेतल्याचे स्पष्ट झाले असून, आता प्रत्यक्षात किती रक्कम निश्चित होते आणि कोणाकडून वसुली केली जाते, याकडे ग्रामस्थांचे लक्ष लागले आहे.