ज्येष्ठ नेते भानुदास एकनाथ कोतकर यांचे निधन; अहिल्यानगर जिल्ह्यात शोककळा!

अहिल्यानगर : अहिल्यानगर जिल्ह्याच्या राजकीय, सहकार आणि कृषी क्षेत्रात दीर्घकाळ कार्यरत राहिलेले ज्येष्ठ काँग्रेस नेते तथा कृषी उत्पन्न बाजार समितीचे माजी सभापती भानुदास एकनाथ कोतकर यांचे आज सकाळी निधन झाले. ते ७४ वर्षांचे होते. त्यांच्या निधनाने शहरासह जिल्ह्यातील राजकीय आणि कृषी क्षेत्रातून हळहळ व्यक्त होत आहे.

मिळालेल्या माहितीनुसार, भानुदास कोतकर यांना हृदयविकाराचा त्रास जाणवू लागल्याने अहिल्यानगर येथील आनंदऋषीजी हॉस्पिटलमध्ये दाखल करण्यात आले होते. मात्र, उपचारादरम्यान त्यांची प्राणज्योत मालवली.

काँग्रेस पक्षाच्या माध्यमातून त्यांनी राजकीय क्षेत्रात काम केले. तसेच कृषी उत्पन्न बाजार समितीच्या माध्यमातूनही त्यांनी योगदान दिले. राजकारण, सहकार आणि कृषी क्षेत्रातील त्यांच्या कार्यामुळे त्यांची जिल्ह्यात ओळख होती.

त्यांच्या निधनाची बातमी समजताच राजकीय आणि सामाजिक क्षेत्रातून शोक व्यक्त केला जात आहे. त्यांच्या निधनाने जिल्ह्याच्या राजकीय वर्तुळात एक ज्येष्ठ नेतृत्व हरपल्याची भावना व्यक्त होत आहे. ज्येष्ठ नेते भानुदास एकनाथ कोतकर यांच्या निधनाने अहिल्यानगर जिल्ह्यात शोककळा पसरली आहे.