दुष्काळी परिस्थितीत शेतकऱ्यांना दिलासा द्या; नियम-कायद्यांचे कारण सांगून गैरसमज पसरवू नका! -पालकमंत्री राधाकृष्ण विखे

जामखेड, दि. १ (प्रतिनिधी) : जामखेड तालुक्यातील दुष्काळी परिस्थितीचा सामना करताना प्रशासकीय यंत्रणेने अतिशय संवेदनशीलतेने काम करावे. नियम आणि कायद्यांची कारणे सांगून शेतकऱ्यांमध्ये गैरसमज निर्माण करू नयेत. शासन शेतकऱ्यांच्या पाठीशी भक्कमपणे उभे असून, जामखेड तालुका दुष्काळमुक्त करण्यासाठी जलसंपदा विभागामार्फत महत्त्वपूर्ण निर्णयांची कार्यवाही सुरू आहे. कुकडी धरण समूहातील पाण्याचा लाभ आवर्तनाच्या माध्यमातून देण्याबाबत निश्चित विचार केला जाईल, अशी ग्वाही जलसंपदा तथा जिल्ह्याचे पालकमंत्री राधाकृष्ण विखे पाटील यांनी दिली.

मंत्री विखे पाटील यांनी जामखेड तालुक्यातील दुष्काळी परिस्थितीचा आढावा घेतला. तसेच आरणगाव येथे शेतकऱ्यांच्या बांधावर जाऊन पिकांची पाहणी केली आणि शेतकऱ्यांशी संवाद साधत त्यांना दिलासा दिला.

दुष्काळी परिस्थितीच्या उपाययोजनांचा आढावा

कर्जत-जामखेड तालुक्यांतील दुष्काळी भागातील समस्या जाणून घेण्यासाठी सभापती प्रा. राम शिंदे यांच्या उपस्थितीत आढावा बैठक घेण्यात आली. यावेळी पाणीटंचाई, चारा उपलब्धता, पीकनुकसान, पीक विमा, वीजपुरवठा आणि जलजीवन मिशनच्या योजनांसह विविध प्रश्नांवर चर्चा करण्यात आली.

दुष्काळी भागाला न्याय देण्यासाठी मुख्यमंत्री देवेंद्र फडणवीस यांनी जलदगतीने निर्णय घेतले आहेत. उपलब्ध पाण्याचे योग्य नियोजन करण्याबरोबरच जनावरांसाठी चारा आणि पाण्याची व्यवस्था करणे प्राधान्याचे आहे. तालुक्यात चारा उत्पादन वाढविण्यासाठी कृषी आणि पशुसंवर्धन विभागाच्या अधिकाऱ्यांनी समन्वयाने नियोजन करावे, अशा सूचना मंत्री विखे पाटील यांनी दिल्या.

पंचनामे आणि टँकर नियोजनात हलगर्जीपणा नको

दुष्काळी परिस्थितीत नुकसानग्रस्त शेतकऱ्यांना मदतीपासून वंचित ठेवले जाणार नाही, असे स्पष्ट करत मंत्री विखे पाटील यांनी पंचनामे आणि मदतीच्या प्रक्रियेत गांभीर्याने काम करण्याचे निर्देश दिले. टँकरद्वारे पाणीपुरवठ्याच्या नियोजनासाठी ग्रामसेवक आणि तलाठ्यांनी उपस्थित राहणे सक्तीचे करावे, असेही त्यांनी सांगितले.

प्रत्येक विभागाच्या अधिकाऱ्यांनी आणि क्षेत्रीय कर्मचाऱ्यांनी समन्वय ठेवून काम करावे. बैठकीत चुकीची माहिती देऊ नये. अधिकाऱ्यांच्या हलगर्जीपणामुळे नागरिकांमध्ये रोष निर्माण होऊ देऊ नका, अन्यथा कारवाई करण्याची वेळ आणू नका, असा इशाराही त्यांनी दिला.

अतिवृष्टीग्रस्त कामांसाठी निधी उपलब्ध

अतिवृष्टीमुळे नुकसान झालेल्या कवडगाव, चौंडी आणि जवळा येथील कोल्हापूर पद्धतीच्या बंधाऱ्यांची कामे, मोहरी तलावाचा सांडवा तसेच कुकडी कालव्यांच्या नुकसानग्रस्त भागांच्या दुरुस्तीसाठी जलसंपदा विभागाने निधी उपलब्ध करून दिला असल्याची माहिती मंत्री विखे पाटील यांनी दिली.

जामखेडला अतिरिक्त पाणी देण्याची मागणी

सभापती प्रा. राम शिंदे यांनी तालुक्यातील विविध प्रश्नांचा आढावा घेत कृष्णा खोऱ्यातील अतिरिक्त पाणी जामखेड तालुक्याला मिळावे, अशी अपेक्षा व्यक्त केली. दुष्काळी परिस्थितीचा सामना करण्यासाठी शासनाने आवश्यक निर्णय घेतले असून, त्यांची प्रभावी अंमलबजावणी करण्याची जबाबदारी प्रशासनाची आहे, असे त्यांनी नमूद केले.

पीक विमा, वीजपुरवठा आणि जलजीवन मिशनच्या योजनांबाबत प्रशासनाने अधिक गांभीर्याने काम करण्याची गरज असल्याचेही राम शिंदे यांनी सांगितले. यावेळी आमदार सुनील कर्जतकर यांनी विविध सूचना मांडल्या. अधिकारी व पदाधिकाऱ्यांची उपस्थिती या बैठकीला भाजपचे जिल्हाध्यक्ष दिलीप भालसिंग, नगराध्यक्षा प्रांजल चिंतामणी, अतिरिक्त जिल्हाधिकारी शैलेंद्र हिंगे, अधीक्षक अभियंता अलका अहिरराव, कृषी अधिकारी सुधाकर बोराळे, वीज वितरण कंपनीचे रमेश पवार, जिल्हा पशुसंवर्धन अधिकारी दशरथ दिघे, प्रांताधिकारी नितीन पाटील, विनायक देशमुख, अंबादास पिसाळ यांच्यासह विविध विभागांचे अधिकारी, पदाधिकारी आणि शेतकरी उपस्थित होते.