विद्यार्थ्यांच्या कल्पकतेला मिळणार व्यासपीठ; दादा पाटील महाविद्यालयात ‘आयडियाचा आविष्कार’

कर्जत : विद्यार्थ्यांमधील सर्जनशीलता, संशोधनाची आवड आणि नव्या कल्पनांना प्रोत्साहन देण्यासाठी रयत शिक्षण संस्थेच्या दादा पाटील महाविद्यालयात ‘आयडियाचा आविष्कार’ जिल्हास्तरीय स्पर्धेचे आयोजन करण्यात आले आहे. सावित्रीबाई फुले पुणे विद्यापीठ आणि रयत शिक्षण संस्थेच्या मार्गदर्शनाखाली ही स्पर्धा होणार आहे. या स्पर्धेत मानवविद्या, भाषा, ललित कला, वाणिज्य व व्यवस्थापन, विज्ञान, कृषी, पशुसंवर्धन, अभियांत्रिकी व तंत्रज्ञान, वैद्यकीय तसेच फार्मसी अशा विविध क्षेत्रांतील विद्यार्थ्यांना सहभागी होता येणार आहे. विद्यार्थ्यांनी आपल्या कल्पनांना प्रकल्पाचे स्वरूप देऊन समाजोपयोगी आणि नाविन्यपूर्ण संकल्पना सादर करणे अपेक्षित आहे. स्पर्धेसाठी माध्यमिक, कनिष्ठ आणि वरिष्ठ असे तीन विभाग निश्चित करण्यात आले आहेत. वरिष्ठ विभागात प्रथम क्रमांकासाठी ३ हजार, द्वितीय क्रमांकासाठी २ हजार, तर तृतीय क्रमांकासाठी १ हजार रुपयांचे रोख पारितोषिक देण्यात येणार आहे. याशिवाय प्रत्येक विभागातील तीन प्रकल्पांना प्रत्येकी ५०१ रुपयांचे उत्तेजनार्थ पारितोषिक दिले जाणार आहे. माध्यमिक विभागातील विजेत्यांनाही रोख पारितोषिके देण्यात येणार असून, प्रथम क्रमांकासाठी ७०१ रुपये, द्वितीय क्रमांकासाठी ११०१ रुपये आणि तृतीय क्रमांकासाठी ७०१ रुपये देण्यात येणार असल्याचे प्रसिद्धीपत्रकात नमूद करण्यात आले आहे. महाविद्यालयाचे प्राचार्य डॉ. संजय नगरकर यांच्या मार्गदर्शनाखाली स्पर्धेचे नियोजन करण्यात आले आहे. विद्यार्थ्यांच्या कल्पनांना योग्य दिशा आणि व्यासपीठ मिळावे, तसेच त्यांच्यामध्ये संशोधनाची दृष्टी विकसित व्हावी, या उद्देशाने महाविद्यालयाकडून विविध उपक्रम राबविले जात आहेत. वरिष्ठ विभागासाठी प्रा. महेश भदाणे, तर माध्यमिक व कनिष्ठ विभागासाठी प्रा. नितीन दुपडे यांच्याशी संपर्क साधण्याचे आवाहन करण्यात आले आहे. जिल्ह्यातील शाळा व महाविद्यालयांतील विद्यार्थ्यांनी उत्स्फूर्त सहभाग नोंदवून आपल्या नाविन्यपूर्ण कल्पना सादर कराव्यात, असे आवाहन प्राचार्य डॉ. संजय नगरकर यांनी केले आहे.